مرتضى منصور يوجه رسالة قوية لوزير الرياضة: إ«حنا مش خرفان والدوري مش هيرجع» (فيديو)

وجه المستشار مرتضى منصور رسالة شديدة اللهجة لوزير الشباب والرياضة الدكتور أشرف صبحي بعد إعلان الأخير خطة الوزارة لعودة النشاط الرياضي وموافقة الحكومة على استئناف الدوري الممتاز.

وقال «منصور»، في مداخلة مع قناة الزمالك، مساء أمس الاثنين: «سيادة الوزير اللي أنا بحترمه وبأيده وبدعمه لأنه رجل مؤدب ونظيف، إيه اللي حضرتك عملته يا معالي الوزير النهاردة، هو حضرتك متصور إن إحنا خرفان ومعيز المسؤولين عن الأندية؟ حضرتك بتجرجرنا بحبل يمين يمين شمال شمال؟ لا يا سيادة الوزير حضرتك كدة فاهم غلط مع احترامي لسيادتك والحكومة ورئيس الحكومة والشغل اللي أنتم عملينه، لا حضرتك فاهم غلط، رؤساء الأندية يا فندم اللي بينتخبهم أعضاء جمعية عمومية محترمة وحضرتك القرارات المتعلقة بكرة القدم لو حضرتك تدخلت فيها يبقى تدخل حكومي واضح».

وأضاف رئيس الزمالك: «أنا مندهش حضرتك قلت إن فيه نادي من الأندية لما فتح الاشتراكات النهاردة جاب 40 مليون جنيه، لا يا سيادة الوزير لازم تقول لنا مين النادي اللي عمل المعجزة دي، نادي جاب النهاردة اشتراكات أول يوم فتح 40 مليون، طيب يقولنا عمل إيه عشان نعمل احنا كمان وكل الأندية تعمل زيه، يعني مين اللي وصل لحضرتك إن فيه نادي أول ما فتح النهاردة لم 40 مليون جنيه اشتراكات والاشتراك معروف في كل الأندية مايزيدش عن 600-700 جنيه، يعني النهاردة حضرتك اللي راح مثلًا 100 ألف؟ ما ده معناه إن راح النهاردة 40-50 ألف، مش ممكن يا معالي الوزير، بجد حضرتك المعلومة لازم تتأكد منها وتقولنا حضرتك مين النادي ده عشان نكلمهم ونتعلم منهم».

وتابع: «رقم اثنين، هو حضرتك يا معالي الوزير لما كان واحد بيموت في الأسبوع وقفتوا الدوري ولما دلوقتي 100 واحد عايز تشغل الدوري؟ حضرتك لما وقفت الدوري كان حالة بتموت في الأسبوع وكان 7 أو 8 حالات، دلوقتي الحالات لما بقت بالآلاف ولما الناس بتموت بالـ 100 كل يوم، حضرتك عايز ترجع الدوري عشان النادي الأهلي؟ أنا مشفتش كدة بصراحة، لا حضرتك اطلع قول كدة، زي ما الناس كلها قالت، إحنا عايزين نرجع الدوري عشان النادي الأهلي مخدش بطولات السنة دي يبقى خد الدوري، زي ما عمرو الجنايني صمم يعمل الماتش اللي فات ده لأن الزمالك غلب الأهلي وخد السوبر في أبوظبي، لا لازم الزمالك يتغلب بقى من الأهلي الماتش ده يوم 25، لا مش كدة، لا إحنا مش خرفان مع احترامي لك ولعمرو الجنايني والناس دي كلها، معالي الوزير أنت عارف احترامي لك وبحبك وبحترمك وادعمك وفوق دماغنا بس أنت مابتتعملش مع خرفان، أنت بتتعامل مع رجالة محترمة، سواء القسم الأول أو الثاني أو الثالث أو الدوري الممتاز، ولما 14 نادي من 18 يبعتوا لسيادتك ولعمرو الجنايني مش هنكمل.. وأنا بقولك مش هنكمل الدوري، حضرتك روح كمله مع الـ 4 أندية الثانية، وبعدين ده مش عند مننا، بالمنطق وبالعقل، يعني إذا كان الأخ عمرو الجنايني خصم 3 نقاط وقالك الدوري هيبوظ، عشان ماتش قلتوا الدوري هيبوظ، ما بالك بقالنا 3 أشهر كل اللعيبة فين؟ فين اللعيبة الأجانب نجيبهم من بلادهم؟ وكلهم منتخبات يعني بلادهم خايفة عليهم، أجيب ساسي ازاي وهو في المنتخب، أجيب بن شرقي ازاي وهو في المنتخب، ما برضه دول مش خرفان، حضرتك فاهم غلط، حضرتك النهاردة أكبر خطأ من ساعة ما جيت، وأنا قلت قبل كدة اللائحة بتقول إيه، النادي الأهلي إديله الدوري؟ إديله الدوري، إنما محدش يموت، مش هنضحي بآلاف اللعيبة والمدربين والحكام عشان الأهلي تقول له بطل الدوري، لا الخوف مايوصلش للدرجة دي من نادي».

واستطرد مرتضى منصور في مداخلته: «بعدين حضرتك الاجتماع اللي معمول بكرة للأندية وبعد بكرة لباقي الأندية، هو حضرتك الاجتماع ده طب هو معمول ليه؟ قول لنا سيادتك يعني، ما أنت خلاص خدت القرار وده قرار حكومي، وأنا بقولك مش هيرجع وشوف مين اللي هيروح، يعني حضرتك شوف مين اللي هيروح يا معالي الوزير الماتشات، يعني أنا النهاردة خايف على لاعبتي وكل الأندية خايفة على لاعيبتها، يعني حضرتك الأهلي عشان تديله الأهلي يموت أي حد كدة، حضرتك إديني سبب واضح يا معالي الوزير إن حضرتك عايز ترجع الدوري واللي يموت يموت، بقول لحضرتك إحنا مش خرفان ولا اللعيبة دي معيز عشان النادي الأهلي ياخد الدوري عشان السنة دي مخدش ولا بطولة حضرتك بترضي النادي الأهلي فتقول خلاص رجع الدوري واللي يموت يموت، وبعدين حضرتك بتقول كلام غريب جدًا إن الأندية تتحمل المسؤولية وتوابع أي حد يحصله حاجة، يعني حضرتك هنقضي طول حياتنا بقى أنا ورؤساء الأندية لو حد حصله حاجة طول حياتنا في التخشيبة؟ حضرتك بأي منطق بتتكلم؟ وبعدين حضرتك بتستقبل محمود الخطيب ولما رئيس نادي الزمالك بيطلب حضرتك مابتردش ولما السيد تركي آل الشيخ بيطلب حضرتك ما بتردش، ما أنا عايز أعرف فيه إيه؟ إيه الرعب اللي في البلد ده؟ خايفين من إيه؟ خلينا نتكلم بصراحة، فيه رئيس جمهورية محترم في دولة محترمة، ماينفعش اللي بيحصل ده».

شاهد المداخلة كاملة